ast


Contents

  1. Carauterístiques del sistema
  2. Instalación
    1. Los paquetes encamentaos instálense de miente predeterminao
    2. Visualización incorreuta al instalar nel espaciu llibre contiguu más grande del discu
    3. La ivernación puede nun tar disponible tres d'el particionáu automáticu
  3. Anovamientu
    1. Fallos d'arranque en sistemes con plaques base Intel D945
    2. Los anovamientos dende la versión Beta puen usar LABEL= en /etc/fstab
    3. Fallu ImportError de Python en sistemes anovaos enantes d'Ubuntu 9.04 RC
    4. Los anovamientos dende versiones Alpha pue que necesiten tornar a cifrar los direutorios personales cifraos
    5. Los anovamientos dende Ubuntu 8.10 puen tener lilo instaláu
    6. Yá nun s'almite l'asignación del dominiu de regulación inalámbrico per aciu d'opción del módulu
    7. Hai qu'amestar la miniaplicación de xestión de la rede tres del anovamientu
    8. La miniaplicación de Xestión de rede en Kubuntu nun coneuta con redes WPA2
    9. Ctrl-Alt-Retrocesu desactiváu de mou predetermináu en Xorg
    10. Cambeos nes notificaciones d'anovamientos disponibles
  4. Otros problemes conocíos
    1. Regresiones de rendimientu en tarxetes gráfiques Intel
    2. La pantalla conxélase con tarxetes gráfiques Intel
    3. Bloqueos al desaniciar ficheros en sistemes de ficheros ext4
    4. Camudar a ext4 necesita un anovamientu manual de grub
    5. Dables problemes de perda de datos al camudar el tamañu a sistemes de ficheros ext4
    6. Pulseaudio activáu inalvertidamente en Kubuntu al instalalu dende'l DVD o al anovalu con apt-get
    7. Perfiles de Apparmor incompatibles con ecryptfs
    8. Avahi nun arranca si esiste un dominiu .local
    9. Wubi reutiliza un direutoriu «ubuntu» yá existente y desanícialu na desinstalación
    10. Dables colingues ocasionales na arquiteutura ARM
    11. Problemes de visualización de testos en Mythbuntu con controlador Radeon
    12. Corrupción del índiz de Tracker

Estes notes d'espublización documenten problemes conocíos con Ubuntu 9.04 y les sos variantes.

Carauterístiques del sistema

La cantidá mínima de memoria necesaria pa Ubuntu 9.04 ye 256 MiB de RAM. Cuando namái se dispón de la cantidá mínima de memoria, el procesu d'instalación allánciase más de lo normal, pero complétase ensembre y el sistema furrula de miente afayaízo una vegada instaláu.

Los sistemes con poca memoria podrán usar el desktop CD pa instalar Ubuntu 9.04 esbillando «Instalar Ubuntu» nel menú d'arranque pa executar namái l'instalador, n'arróu d'aniciar l'escritoriu dafechu esbillando «Prebar Ubuntu ensin alteriar el so equipu».

Instalación

Los paquetes encamentaos instálense de miente predeterminao

En concase col Manual de direutives de Debian (que diz «El campu 'Recommends' tien d'enumberar los paquetes que tendríen de dir xunto con esti en toles instalaciones menos nes pocu usuales»), el sistema de xestión de paquetes agora instala de miente predeterminao los paquetes que s'enumberen nel campu Recommends: d'otros paquetes instalaos, arriendes de los conseñaos en Depends:. Si deseya evitar esti comportamientu con paquetes específicos, use apt-get --no-install-recommends; si deseya facelo permanente, afite APT::Install-Recommends "false"; en /etc/apt/apt.conf. Decátese de qu'esto pue prevocar la perda de carauterístiques en dalgunos programes.

(Esti cambéu llevóse a cau n'Ubuntu 8.10.)

Visualización incorreuta al instalar nel espaciu llibre contiguu más grande del discu

Cuando s'activen al mesmu tiempu les opciones «Instalalu xunto a los otros» y «Usar l'espaciu llibre contiguu más grande», ésta cabera opción visualizará una información incorreuta na barra de la partición qu'amuesa'l aspeutu del discu tres la instalación. Sicasí, al esbillar esta opción, Ubuntu instalaráse correcho na partición erma más grande. (364181)

La ivernación puede nun tar disponible tres d'el particionáu automáticu

L'esquema de particionáu predetermináu del instalador reserva en dalgunos casos una partición d'intercambéu más pequeña que la memoria física del sistema. Esto torga l'usu de la ivernación (suspender al discu) porque la imaxe del sistema nun cabe na partición d'intercambéu. Si pretende usar la ivernación nel so sistema, tendrá d'asegurase de que'l tamañu de la partición d'intercambéu ye, a lo menos, tán grande como la RAM física del sistema.

Anovamientu

Los usuarios de Kubuntu puen anovar direutamente de Kubuntu 8.04 a Kubuntu 9.04. A los usuarios qu'anoven d'esti mou aconséyase-yos que llean les notes d'espublización d'Ubuntu 8.10, darréu que los problemes ellí descritos tamién s'apliquen nesti casu.

Fallos d'arranque en sistemes con plaques base Intel D945

Dalgunos usuarios informaren que la deteición de los discos duros SATA ye más sele de lo avezao con plaques base Itenl D945 en Ubuntu 8.10. Esto pue prevocar que'l sistema caiga nún intérprete de comandos «busybox» en initramfs con un mensax d'error de la triba «Gave up waiting for root device». Agarde ún o dos minutos y darréu cole del intérprete de comandos de initramfs tecleando 'exit'. L'arranque tendría de siguir ensin problemes. En casu aviesu, agarde un pocu más y torne a tentalo otra vegada. Cuando'l sistema tenga aniciao, edite'l ficheru /boot/grub/menu.lst y amieste rootdelay=90 na seición «kernel» del so núcleo autual.(bug 290153).

Los anovamientos dende la versión Beta puen usar LABEL= en /etc/fstab

Los sistemes instalaos per aciu de Jaunty Alpha 5, Jaunty Alpha 6 o or Ubuntu 9.04 beta puen usar la sintaxis LABEL= en /etc/fstab pa identificar sistemes de ficheros. Esto pue prevocar comportamientos inesperaos postreramente si s'amiesta llueu otru discu (como, por exemplu, una unidá USB) que caltenga sistemes de ficheros con etiquetes concasantes. Sacantes que tea xuru de que ye lo que-y pruye, encamentámos-y que pase a usar identificadores únicos universales (UUIDs).

Por exemplu, si un sistema de fichero ta identificáu como LABEL=home en /etc/fstab, pue determinar el UUID del siguiente mou:

blkid -o value -s UUID -l -t LABEL=home

Llueu pue sustituyir LABEL=home per UUID=salida, au salida ye la salida del comandu blkid.

Los sistemes instalaos per aciu de la «release candidate» o la versión final d'Ubuntu 9.04 nun tienen esti problema.

Fallu ImportError de Python en sistemes anovaos enantes d'Ubuntu 9.04 RC

Un fallu nos paquetes de Python presentes en Jaunty enantes de la versión Ubuntu 9.04 RC prevocaba que los módulos de Python nun se rexistraren pal so usu pola versión actual de Python, la 2.6. Esti problema apaez como un fallu d'importación. Por exemplu:

ImportError: No module named loqueseya

inclusu magar que'l paquete que proporciona'l módulo ta instaláu.

Pa igualo, execute'l comandu:

sudo dpkg-reconfigure python-loqueseya

pa cada paquete python-loqueseya que proporcione un módulu afeutáu.

Los anovamientos dende versiones Alpha pue que necesiten tornar a cifrar los direutorios personales cifraos

A los usuarios que tengan estau usando eCryptfs en dalguna de les versiones Alpha de Jaunty encamiéntase-yos a que tornen a cifrar cualesquier ficheru previamente cifráu. Un fallu na versión 2.6.28 del núcleu facía la escritura de conteníu al debalu de la memoria del núcleu nes testeres de los fichero cifraos con eCryptfs. Nel núcleu de la versión «release candidate» de Jaunty yá s'aplicó la igua pa los usuarios d'Ubuntu. Los usuarios de eCryptfs n'Ubuntu que tean usando esti núcleo tendrán de tornar a cifrar cada ficheru cifráu per aciu de /usr/bin/ecryptfs-rewrite-file. Pa más información, consulte ecryptfs-rewrite-file(1). Ver 345544.

Los anovamientos dende Ubuntu 8.10 puen tener lilo instaláu

Los sistemes Ubuntu 8.10 instalaos dende'l desktop CD instalaben por error el paquete lilo arriendes de grub, magar que s'use grub p'arrancar. Si usa el métodu encamentáu d'anovamientu per duana del Xestor d'actualizaciones, desinstalaráse'l paquete lilo si s'adica que nun s'usa. Si anova per duana de dalgún otru métodu y ta xuru de que namái ta usando'l cargador d'arranque GRUB, encamentámos-y a que desinstale'l paquete lilo manualmente. Bug 314004.

Yá nun s'almite l'asignación del dominiu de regulación inalámbrico per aciu d'opción del módulu

Ubuntu 9.04 activa la infraestructura de regulación inalámbrico CRDA pa remanar qué canales inalámbricos puen usase y son adicables nun allugamientu particular. Si enantes taba la opción del módulu en /etc/modprobe.d/options de mou asemeyáu al descritu darréu pa dexar l'accesu a ciertos canales del so allugamientu llocal, ye dable que la so conexón inalámbrico dexe de furrular:

  • options cfg80211 ieee80211_regdom=EU

Tendría de quitar esta opción del módulu del núcleu nel anovamientu a Ubuntu 9.04 y usar en so llugar el comandu iw reg.

Hai qu'amestar la miniaplicación de xestión de la rede tres del anovamientu

Cuando s'anova dende Kubuntu 8.10, hai qu'amestar manualmente la miniaplicación de xestión de la rede nel panel. (bug 349066).

plasma-1.png

plasma-2.png

plasma-3.png

Calque nel iconu de Plasma arriba a mandrecha.

Calque n'Amestar.

Calque dos vegaes sobro Xestión de la rede.

La miniaplicación de Xestión de rede en Kubuntu nun coneuta con redes WPA2

La miniaplicación de Xestión de rede en Kubuntu nun coneuta con redes WPA2 en ciertes configuraciones VPN. Como solución temporal, puede usar knetworkmanager (afáyase nel DVD) o network-manager-gnome. (339313)

Ctrl-Alt-Retrocesu desactiváu de mou predetermináu en Xorg

La combinación de tecles Ctrl-Alt-Retrocesu, que fuercia al sistema X-Window a reaniciase, alcuéntrase agora desactivada de miente predeterminao, pa evitar el problema de calcala accidentalmente. Los usuarios que deseyen esta función puen activala nel so xorg.conf o executando'l comandu sudo dontzap --disable.

Cambeos nes notificaciones d'anovamientos disponibles

Ubuntu 9.04 introduz un cambéu na xestión d'anovamientos de paquetes, llanzando direutamente'l Xestor d'actualizaciones n'arróu d'amosar un iconu de notificación nel panel de GNOME. Notificaráse-yos diariamente a los usuarios cualesquier anovamientu de seguridá esistente, pero pa los anovamientos que nun tean rellacionaos con problemes de seguridá, namái notificaráse-yos una vegada per selmana.

Los usuarios que deseyen siguir recibiendo notificaciones d'anovamientos como de costume, puen restaurar el comportamientu anterior usando'l siguiente comandu:

gconftool -s --type bool /apps/update-notifier/auto_launch false

Otros problemes conocíos

Regresiones de rendimientu en tarxetes gráfiques Intel

Tiense informao que l'usu de chipsets gráficos Intel prevoquen regresiones de rendimientu n'Ubuntu 8.10 en comparación con versiones anteriores (bug 252094). Munchos de los problemes iguáronse n'Ubuntu 9.04, pero dalgunos siguin entá.

  • Dalgunos usuarios comprobaren que'l rendimientu meyora col usu de la heurística de migración «greedy». Esto pue facese executando sudo gedit /etc/X11/xorg.conf y amestando Option "MigrationHeuristic" "greedy" na seición Device del so xorg.conf.

  • Per otru llau, hai disponible una nueva opción esperimental d'arquiteutura d'aceleración pa usuarios de tarxetes gráfiques Intel: «DRI2/UXA». Les nueses prebes determinen que proporciona meyores significatives de rendimientu en dalgunos casos, pero tamién acarria un riesgu de problemes severos d'estabilidá. Pue optar por activala executando sudo gedit /etc/X11/xorg.conf y amestando Option "AccelMethod" "UXA" na seición Device del so xorg.conf. Los usuarios que deseyen maximizar la estabilidá tendríen de siguir usando'l métodu d'aceleración estándar predetermináu: «EXA».

    Warning /!\ Por favor, decátese de que, nel peor de los casos, esto podría facer que'l entornu gráficu nun arranque dafechu o tornase n'inutilizable ensembre. En talu casu, arranque en mou de recuperación o calque Ctrl+Alt+F2, anicie una sesión na consola de testu ya use sudo nano /etc/X11/xorg.conf pa quitar la opción UXA.

  • Nel casu de que lo anterior nun sirva un res, dalgunos usuarios informaren de resultaos positivos al usar una versión más antigua del controlador.

La pantalla conxélase con tarxetes gráfiques Intel

Los usuarios de chipsets gráficos Intel informen que la pantalla conxélase unos minutos dempués d'esconsoñar al equipu d'una suspensión o ivernación (bug 339091), o baxo otres circunstancies. En munchos casos, informóse de que desactivar los efeutos d'escritoriu en Sistema → Preferencies → Aspeutu foi d'aida.

Si entá sigui dando problemes, pue amestar Option "DRI" "off" na seición Device de /etc/X11/xorg.conf, según se describió anterior. Esto desactivará l'aceleración 3D y los efeutos d'escritoriu, pero fadrá que la suspensión furrule de nuevu de miente fidable y arriendes evitará munches tribes de fallos.

Estos bloqueos asoceden de mou particular nos chips i965 (359392). Por ello, na versión final desactiváronse los efeutos d'escritoriu pa esti chipset. Volverán a activase nun anovamientu de la versión 9.04 cuando'l problema se tenga iguáu.

Bloqueos al desaniciar ficheros en sistemes de ficheros ext4

En dalgunos casos, desaniciar ficheros d'un sistema ext4 prevoca bloqueos software nel núcleu (330824). Ta pescudándose l'orixe del fallu y a la espera d'algamar una igua al mesmu en mou d'anovamientu tres de la espublización de la versión final. Pa evitar esti problema, los usuarios puen llevar a cau la instalación usando'l sistema de ficheros ext3 y convertir postreramente los sos sistemes a ext4 (según se documenta nel wiki de ext4) cuando tea disponible la solución.

Camudar a ext4 necesita un anovamientu manual de grub

Si esbilla anovar el so sistema de ficheros / o /boot de ext2 o ext3 a ext4 (como se describe nel wiki de ext4), tendrá d'usar arriendes el comandu grub-install dempués de l'actualización a Ubuntu 9.04 pa reinstalar el so cargador d'arranque. Si nun lo fai, la versión de GRUB instalada nel so seutor d'arranque nun será quien a lleer el núcleu allugáu nel sistema de ficheros ext4 y el so sistema nun podrá armase.

Dables problemes de perda de datos al camudar el tamañu a sistemes de ficheros ext4

La utilidá resize2fs puede causar perda de datos al estender o encoyer sistemes de ficheros ext4 en mou desconeutáu. Consulte esti corréu del caltenedor principal pa más información. Por desgracia, enterámonos abondo sero pa poder igualo n'Ubuntu 9.04. Puede iguar estos problemes temporalmente desactivando previamente les opciones flex_bg y uninit_bg (¡nun intente facelo nún sistema de ficheros yá montáu!):

+ tune2fs -O ^flex_bg,^uninit_bg /dev/NOME_PRESÉU
+ e2fsck /dev/NOME_PRESÉU
+ 

Sicasí, encamentámos-y enforma que, más que nunca, s'asegure de facer copies de seguridá enantes de tentar camudar el tamañu d'un sistema de ficheros ext4.

Pulseaudio activáu inalvertidamente en Kubuntu al instalalu dende'l DVD o al anovalu con apt-get

Cuando se instala Kubuntu 9.04 dende imáxenes DVD o alternate CD, o cuando s'anova a Kubuntu 9.04 dende una versión anterior per aciu de apt-get dist-upgrade, instálase por error el paquete pulseaudio. Esti paquete nun tendría d'instalase como parte d'un escritoriu Kubuntu. Los usuarios pueden desinstalar esti paquete per duana del comandu:

sudo apt-get purge pulseaudio

Perfiles de Apparmor incompatibles con ecryptfs

Cuando s'usen direutorios cifraos xunto con apparmor en mou «enforcing», apparmor torgará l'accesu a ciertos ficheros inesperadamente porque'l núcleu Linux camienta que'l procesu ta accediendo al ficheru per aciu de caminos cifraos y non cifraos simultáneamente (359338). Como solución temporal, los usuarios pueden modificar los sos perfiles d'apparmor en /etc/apparmor.d/ pa conceder permisos a @{HOME}/.Private/**.

Avahi nun arranca si esiste un dominiu .local

El paquete avahi-daemon, qu'implementa l'estándar mDNS «zeroconf» standard, inclúi una comprobación pa torgar la so execución cuando esiste un dominiu DNS .local conflictivu. Informóse de que dalgunos ISPs espublicen esi dominiu .local nes sos redes, lo que fadría que los equipos Ubuntu 9.04 nun pudieran ver los nomes espublizaos na rede llocal (327362).

Pa forciar l'usu de mDNS nuna rede configurada d'esta miente, los usuarios pueden executar los comandos:

sudo sed -i -e'/AVAHI_DAEMON_DETECT_LOCAL/s/1/0/' /etc/default/avahi-daemon
sudo service avahi-daemon start

Wubi reutiliza un direutoriu «ubuntu» yá existente y desanícialu na desinstalación

Si yá hai un direutorio denomáu «ubuntu» na unidá de destín, ésti reutilizaráse durante la instalación Windows, y desaniciaráse'l direutoriu ensembre durante la desinstalación (364166). Esto fadrá la perda de ficheros que tuviese anteriormente nesi direutoriu. Encamiéntase camudar el nome d'esi direutoriu «ubuntu» enantes d'empecipiar una instalación Wubi.

Dables colingues ocasionales na arquiteutura ARM

Anguaño, la versión ARM nun almite les llamaes al sistema ppoll() y pselect(), lo que fai qu'a vegaes falle'l montax del sistema de ficheros raigón durante l'aniciu. Esta ye una condición de carrera, ya reintentar l'arranque iguará normalmente'l problema. El trabayu d'amestar tales llamaes al sistema yá ta en procesu y entregaráse como una anovación del núcleu d'Ubuntu 9.04 un tiempu dempués del so asoleyamientu.

Problemes de visualización de testos en Mythbuntu con controlador Radeon

La interface mythtv de Mythbuntu nun dibuxa correcho les tipografíes cuando s'usa'l controlador radeon y s'activa'l DRI (341898). Espérase qu'esti problema s'igüe aína nun anovamientu postreru a la espublización de la versión final. Mentantu, los usuarios pueden iguar temporalmente'l problema desactivando el DRI na configuración del so X-Window.

Corrupción del índiz de Tracker

En dalgunos casos puede asoceder que'l índiz del motor de gueta «tracker» resulte frañáu. Amosaráse una ventana solicitándo-y que «Reindexe tolos conteníos». Esti botón nun furrula, y el serviciu tracker podría entamar a usar una gran cantidá de recursos de CPU y discu. Como igua temporal, calque Alt+F2 y execute'l comando tracker-processes -r. Esti problema iguaráse aína nun anovamientu postreur a la espublización de la versión final (361205).

JauntyJackalope/ReleaseNotes/ast (last edited 2009-04-22 17:07:49 by 75)